دل لگانے کے چکر میں دل کے ڈاکٹر کو کروڑوں کا چونا لگ گیا

لکھنؤ: بھارتی ریاست اتر پردیش کے ضلع مراد آباد میں دل کے 70 سالہ ڈاکٹر کو دوسری شادی کی خواہش مہنگی پڑ گئی، ٹھگوں نے ڈاکٹر کو شادی کا جھانسہ دے کر کروڑوں روپے کا چونا لگادیا۔بھارتی میڈیا کے مطابق 70 سالہ ڈاکٹر کی اہلیہ کا 2019 میں انتقال ہوا تھا جس کے بعد اس نے اخبار میں دوسری شادی کا اشتہار دیا۔ اس اشتہار کو دیکھ کر ایک خاتون نے اس سے رابطہ کیا اور بتایا کہ وہ امریکی ریاست فلوریڈا میں میرین انجینئر کے طور پر کام کرتی ہے اور اس کے شوہر کی موت ہوچکی ہے۔ دونوں کے درمیان رابطے بڑھنے لگے، خاتون نے بتایا کہ وہ ممبئی میں بزنس شروع کرنا چاہتی ہے، اس نے سات لاکھ ڈالر مالیت کا سونا لے رکھا ہے جو وہ ڈاکٹر کے پتے پر ارسال کر رہی ہے۔ بعد ازاں ایک شخص آیا اور اس نے ڈاکٹر سے لائسنس فیس اور کسٹم ڈیوٹی سمیت دیگر اخراجات کی مد میں ایک کروڑ 80 لاکھ روپے کا مطالبہ کیا جو ڈاکٹر نے بینک اکاؤنٹ میں جمع کرادیے۔رقم جمع کرانے کے بعد خاتون کی جانب سے مزید رقم کا مطالبہ کیا گیا جس پر ڈاکٹر نے مخالفت کی تو خاتون نے فون کاٹ دیا اور اس کے بعد غائب ہوگئی۔ ماہر امراض قلب کو جب احساس ہوا کہ اس کے ساتھ کیا ہوا ہے تب تک بہت دیر ہوچکی تھی، سائبر کرائم پولیس نے ڈاکٹر کی درخواست پر مقدمہ درج کرکے تفتیش شروع کردی ہے۔