ہرسال عالمی اردو کانفرنس کا انعقاد خوش آئند ہے، گلزار

کراچی: ممتاز بھارتی شاعر اور فلم ڈائریکٹر گلزار نے کہا ہے کہ پاکستان میں ہر سال عالمی اردوکانفرنس کا ہونا خوش آئند عمل ہے. اس طرح کی کانفرنسزسرکاری سطح پر ہونی چاہیے جس میں نوجوانوں کی نمائندگی بھی ضروری ہے، ہند و پاک مشاعروں کا سلسلہ مستقل بنیادوں پر جاری رہا تو ہم اپنے مرکزسے نہیں بھٹکیں گے، ہندوستان اور پاکستان کی عوام کو قریب لانے میں مشاعرے اہم کردار ادا کر سکتے ہیں، ہر دور میں نوجوان نسل اپنے بڑوں سے سیکھتی ہے، ہمیں چاہیے کہ نوجوانوں کے لیے بہتر پلیٹ فارم تشکیل دیں تاکہ مستقبل میں وہ اس سے فائدہ حاصل کرسکیںان خیالات کا اظہار انھوں نے بات چیت کے دوران کیا، ان کا کہنا تھا کہ ہندوستان میں اب اردو کا دائرہ خاصا وسیع ہو چکا ہے، لوگ عام گفتگو میں اردوزبان کا استعمال کرتے ہیں، ہمارے ہاں موسیقی اور فلمی ڈائیلاگ میں اردوکے درست استعمال کے لیے باقاعدہ تربیت دی جاتی ہے، ایک سوال کے جواب میں بھارتی شاعر گلزارکا کہنا تھا کہ اردو زبان کی ترقی کیلیے دنیا کے جس کونے میں بھی کام ہو رہا ہے ہمیں چاہیے کہ اس میں اپنے حصے کا دیا ضرور جلائیں۔