سنجے دت جیل میں ایک اسٹیج ڈرامے میں پرفارم کریں گے

پونا: سنجے دت جو گزشتہ 3 ماہ سے پونا کی یرودا جیل میں 1993 کے ممبئی دھماکوں کے کیس میں سنائی گئی سزا کاٹ رہے ہیں اب جیل میں ایک ڈرامے میں کردار ادا کریں گے۔ بھارتی اخبار کے مطابق سنجے دت مراٹھی اسٹیج ڈرامے میں ایک کردار ادا کریں گے، یہ اسٹیج ڈرامہ بھارتی ریاست مہاراشٹرا کی روایات کی عکاسی کرے گا اور اسے ہندوؤں کے ایک مذہبی تہوار پر عوام کے سامنے پیش کیا جائے گا۔ ڈرامے میں سنجے دت کے ساتھ دوسرے قیدی بھی اپنی اداکاری کے جوہر دکھائیں گے، ڈرامے کی ہدایات اور کوریاگرافی بھی قیدی خود ہی دیں گے۔ واضح رہے کہ سنجے دت کو 1993 کے بم دھماکوں میں ملوث ملزمان کا اسلحہ گھر میں چھپانے کے جرم میں 2006 میں ٹاڈا عدالت کی جانب سے 6 سال کی سزا سنائی گئی تھی جو رواں سال مارچ میں سپریم کورٹ کی جانب سے کم کر کے 5 سال کر دی گئی تھی۔