الیکشن کمیشن کا این اے 5 اور این اے 27 میں دوبارہ پولنگ کرانے کا فیصلہ

اسلام آباد: الیکشن کمیشن نے پشاور ہائی کورٹ کے فیصلے کی روشنی میں این اے 5 اور این اے 27 کے 18 پولنگ اسٹیشنز میں دوبارہ پولنگ کرانے کا فیصلہ کیا ہے۔ الیکشن کمیشن نے پشاور ہائی کورٹ کے فیصلے کی روشنی میں این اے 5 نوشہرہ کے 9 اور این اے 27 لکی مروت کے 9 پولنگ اسٹیشنز پر دوبارہ پولنگ کرانے کا اعلان کر دیا ہے۔ الیکشن کمیشن کی جانب سے دوبارہ پولنگ کی تاریخ کا اعلان بعد میں کیا جائے گا۔ واضح رہے کہ لکی مروت، نوشہرہ، مردار اور پشاور کے نواحی علاقوں میں قبائلی عمائدین اور مقامی سیاسی رہنماؤں نے متفقہ فیصلہ کرتے ہوئے حلقے کی خواتین پر ووٹ ڈالنے کی پابندی لگا دی تھی جس کا پشاور ہائی کورٹ نے نوٹس لیتے ہوئے انتخابی نتائج روکنے کا فیصلہ دیا تھا اور ایسی پابندی عائد کرنے والے قبائلی عمائدین کی گرفتاری کا حکم دیا تھا۔