آیات پرمبنی اشتہارات کا مناسب حل نکالیں گے،پرویز رشید

اسلام آباد: وفاقی وزیر اطلاعات ونشریات سینیٹر پرویز رشید نے کہا ہے کہ اخبارات میں قرآنی آیات پر مبنی اشتہارات شائع کرنے کی روک تھام کیلیے اخباری مالکان اور ان کی تنظیموں سے مل کر حل نکالا جائیگا۔ بحیثیت مسلمان ہمیں اخبارات میں شائع قرآنی آیات کا تقدس اور احترام ملحوظ خاطر رکھنا چاہیے ، اخبار چھاپنے ، تقسیم کرنے اور پڑھنے والے سب کو اپنا اپنا کردار اداکرنا ہوگا ۔ بدھ کو قومی اسمبلی میں مخدوم زادہ باسط بخاری کے توجہ دلائو نوٹس کا جواب دیتے ہوئے وزیر اطلاعات ونشریات نے کہا کہ قرآن کریم ہمارے دلوں کی دھڑکن ہے۔اس کی بیحرمتی ہم سب کیلیے باعث تکلیف ہے ، حکومت اکیلی قرآنی آیات کی اشاعت کے حوالے سے فیصلہ نہیں کرسکتی ، بہتر ہوگا کہ اخباری مالکان کی تنظیموں کے ذریعے اس کا حل نکالا جائے تاکہ قرآن پاک کی آیات کی اشاعت پر پابندی کا تاثر بھی نہ ملے اور قرآنی آیات کی بیحرمتی بھی نہ ہو، مذہبی طبقہ بھی اگر اس سلسلے میں ہماری رہنمائی کرے تو شکر گزار ہوں گے