برطانیہ کا شام پر ممکنہ فوجی کارروائی کا حصہ نہ بننے کااعلان

برطانیہ نے اعلان کیا ہے کہ وہ شام پر ممکنہ فوجی کارروائی کا حصہ نہیں بنے گاجبکہ امریکی وزیر دفاع چک ہیگل نے کہا ہے کہ امریکا اب بھی اتحادیوں کا منتظر ہے اور چاہتا ہے کہ شام کے خلاف کارروائی اتحادیوں کے ساتھ مل کر کرے۔امریکی وزیر دفاع نے منیلا میں صحافیوں سے بات چیت کرتے ہوئے کہا کہ امریکی صدر اور حکومت یہی چاہتے ہیں کہ وہ شام میں جو بھی کارروائی کریں اس میں اس کے اتحادی بھی شامل ہوں ۔ کئی ممالک شام میں کیمیائی ہتھیاروں سے متعلق تشویش کا اظہار کرچکے ہیں ۔ اس لیے امریکااس معاملے پر برطانیہ سمیت تمام ممالک سے بات چیت جاری رکھے گا۔دوسری جانب شام پرممکنہ حملے میں برطانوی شرکت سے متعلق حکومتی قرارداد برطانوی پارلے منٹ نے مسترد کردی تھی۔یہ قرارداد 285 کے مقابلے میں 272 ووٹوں سے مسترد کردی گئی۔