چیف جسٹس سوموٹو لیں رانا ثنا اللہ کیسے وزیر داخلہ بنا‘پی ٹی آئی

اسلام آباد: پی ٹی آئی رہنماوں نے کہا ہے کہ جھوٹے مقدمات میں عدالت پیش ہوئے، نیب کے کیسز اور ایف آئی اے کے کیسز ختم کرنے کے لیے یہ لوگ آئے ہیں۔ شہریار آفریدی، قاسم سوری نے اسلام آباد کچہری کے باہر میڈیا سے گفتگو کرتے ہوئے کہا کہ پاکستان تحریک انصاف کے خلاف کرپشن کے کوئی کیسز نہیں، مدینہ میں واقع ہوتا ہے اور توہین مذہب کا کیس سیاسی لوگوں کے خلاف پاکستان میں درج کردیا جاتا ہے، پاکستان میں امریکہ کی ایما پر سازش کے تحت امپورٹڈ حکومت لائی گئی۔ انہوں نے مزید کہا کہ چور، لٹیرے آج حکومت میں بیٹھے ہیں، 6 ہزار ارب سے زائد کا ٹیکس تحریک انصاف نے اکٹھا کیا، پاکستان کا سب سے زیادہ زرمبادلہ لایا گیا، پاکستان تحریک انصاف 10 بڑے ڈیم بنا کر گئی، ہم نے دس لاکھ روپے کا عوام کو ہیلتھ کارڈ دیا۔ حکومت ہمیں ڈرانے کی کوشش کر رہی ہے، ہمیں داغدار ماضی والے ڈرانے کی کوشش کر رہے ہیں، چیف جسٹس پاکستان سوموٹو لیں رانا ثنا اللہ کیسے وزیر داخلہ بنا۔ ان کا کہنا تھا کہ پاکستان ہے تو ہم سب ہے، پاکستان کی عزت افواج پاکستان سے جڑی ہوئی ہے، ملک میں عوام کو جو گمراہ کر رہا ہے وہ میڈیا کو زیادہ پتہ ہے۔