اسلام آباد: عوامی نیشنل پارٹی کے سینئر نائب صدر سینیٹر حاجی عدیل نے کہا ہے کہ ثابت ہوگیا کہ عمران خان کی مقبولیت مصنوعی تھی، کمپیوٹرائزڈ سونامی بنایا گیا۔ 11 مئی کو کمپیوٹر کا بٹن دبا کر اے این پی کو ہرایا گیا تھا، ضمنی انتخابات میں جنرل شجاع پاشا کے ملک سے باہر ہونے کی وجہ سے سونامی لاوارث ہوگئی، عمران خان خیبرپختونخوا سے 90 روز میں کرپشن کے خاتمے، ڈرون حملے روکنے بصورت دیگر نیٹو سپلائی روکنے سمیت کوئی ایک وعدہ بھی پورا نہیں کرسکے، ضمنی الیکشن میں پی ٹی آئی کی جانب سے نوشہرہ اور لکی مروت میں خواتین کو ووٹ کے حق سے محروم کرنے کی مذمت کرتے ہیں، پیپلز پارٹی نے اپنے 5 سالہ دور میں عوامی مفاد کے بہت کام کیے تھے۔جمعے کو پارلیمنٹ ہائوس میں صحافیوں سے بات چیت کرتے ہوئے انھوں نے کہا کہ عمران خان 90 روز میں کرپشن ختم کرنے، نیٹو سپلائی، ڈرون حملے رکوانے، وزیراعلیٰ ہائوس کو یونیورسٹی بنانے سمیت کوئی ایک وعدہ بھی پورا نہیں کرسکے جس کی وجہ سے عوام کو شدید مایوسی کا سامنا کرنا پڑا، پشاور کے حلقہ این اے ون کے نتیجے نے واضح کردیا ہے کہ اے این پی کو کمپیوٹر کا بٹن دبا کر ہرایا گیا تھا۔ ایک اور سوال پر انھوں نے کہا کہ پیپلز پارٹی کے 5 سالہ دور میں سوائے ایک فوجی مقدمے کے کسی کو پھانسی نہیں دی گئی۔
تبصرے بند ہیں.