پی ٹی اے نے ہم جنس پرستی سے متعلق پاکستانی ویب سائٹ پر پابندی لگادی

پی ٹی اے نے ملک میں ہم جنس پرستی سے متعلق باضابطہ ویب سائٹ پر پابندی عائد کر دی ہے۔ غیر ملکی خبر رساں ادارے کے مطابق یہ ویب سائٹ پاکستان میں ہم جنس پرستوں کے بارے میں آگاہی اور آپس میں میل ملاپ کے لئے تخلیق کی گئی تھی اور اسے 4ماہ قبل شروع کیا گیا تھا تاہم میڈیا میں اس ویب سائٹ کے بارے میں خبریں عام ہونے پر اس پر پاکستان میں پابندی عائد کردی گئی ہے۔ اس ویب سائٹ کی تخلیق کرنے والے شخص کا کہنا تھا کہ ان کی ویب سائٹ پر کوئی قابل اعتراض مواد نہیں تھا اور اسے بند کرنے کا کا فیصلہ غیر آئینی اور آزادی رائے کے حق کے خلاف ہےتاہم وہ عدالت سے رجوع نہیں کریں گے۔ دوسری جانب پی ٹی اے نے اس سلسلے میں کسی بھی قسم کا موقف دینے سے انکار کردیا ہے۔ واضح رہے کہ اس ویب سائٹ کے خالق کا دعویٰ ہے کہ پاکستان میں ہزاروں ہم جنس پرست افراد اس ویب سائٹ کو استعمال کرتے تھے۔