ٹوئٹر پرامیر کویت کے خلاف لوگوں کو اکسانے پر خاتون کو 11 سال قید کی سزا

کویت سٹی: مقامی عدالت نے سماجی رابطے کی ویب سائٹ ٹوئٹرپر کویت کے امیر کی توہین اور ان کی حکمرانی کے خلاف لوگوں کو اکسانےپر خاتون کو 11 سال قید کی سزا سنا دی۔ غیر ملکی خبر رساں ایجنسی کے مطابق ہدیٰ الاجمی نامی خاتون کو امیر کویت شیخ صبا الاحمد الصبا کی توہین کرنے اور ان کی حکمرانی کے خاتمے کے لئے لوگوں کو اکسانے پر پانچ، پانچ سال جب کہ موبائل فون کے غلط استعمال پر ایک سال کی قید سنائی گئی، دوسری جانب خاتون نے اپنے اوپر لگائے گئے تمام الزامات کو مسترد کردیا۔ واضح رہے کہ ہدیٰ الاجمی کویت کی پہلی خاتون ہیں جنہیں سماجی رابطے کی ویب سائٹ کے استعمال پر سزا سنائی گئی تاہم کویتی قانون کے مطابق ہدیٰ اپنی سزا کے خلاف اپیل کورٹ اور اس کےبعد سپریم کورٹ میں بھی اپیل کرنے کا حق رکھتی ہیں