زلزلے سے نمودار جزیرہ کسی بھی وقت ڈوب سکتا ہے، ماہرین

گوادر: سمندری تحقیق کے لئے پاکستان کے قومی ادارے کے ماہرین نے کہا ہے کہ زلزلے کے نتیجے میں گوادر کے ساحل پر نمودار ہونے والا جزیرہ کسی بھی وقت ڈوب سکتا ہے۔ منگل کو آنے والے زلزلے کے بعد گوادر کے ساحل پر نمودار ہونے والا جزیرہ شہریوں کی دلچسپی کا مرکز بنا ہوا ہے۔ اور مقامی ملاح جزیرہ دیکھنے کے شوقین افراد کو کشتیوں میں بٹھا کر جزیرے پر لے جارہے ہیں۔ سمندری تحقیق کے قومی ادارے کی ٹیم نے بھی جزیرے کا دورہ کیا۔ ٹیم کا کہنا ہے کہ جزیرہ مٹی اور پتھریلی چٹانوں پر مشتمل ہے اور اس میں سے مسلسل میتھین گیس خارج ہو رہی ہے۔ ماہرین نے خبردار کیا کہ جزیرہ کسی بھی وقت سمندر میں ڈوب سکتا ہے، اس لئے وہاں جانے سے اجتناب کیا جائے۔ واضح رہے کہ منگل کو بلوچستان سمیت پاکستان کے مختلف شہروں میں آنے والے زلزلے کے بعد گوادر کے ساحل کےقریب ایک جزیرہ نمودار ہوا ہے جو تقریباً 3 سو فٹ اندر 70 فٹ بلند اور 300 فٹ چوڑا ہے۔ اس سے پہلے 1945ء میں بھی 8.1 شدت کے زلزلہ کے بعد ایک ایسا ہی جزیرہ نمودار ہوا تھا جو بعد میں ڈوب گیا تھا۔