ایک اور ڈاکٹر کورونا وائرس میں مبتلا

پشاور (بیورو رپورٹ ) ایک اور ڈاکٹر کورونا وائرس میں مبتلا ہو گیا ہے ، صوبائی ڈاکٹرز ایسوسی ایشن کے صدر ڈاکٹر فضل منان نے بتایا کہ ڈاکٹر محمد کریم کورونا سے متاثر ہوئے ہیں، ان کا نجی اسپتال میں کورونا ٹیسٹ کیا گیا جو مثبت آیا ہے۔ڈاکٹر فضل منان نے کہا کہ متاثرہ ڈاکٹر مولوی امیر شاہ میموریل اسپتال میں ڈیوٹی سرانجام دے رہے تھے اور انہوں نے اب خود کو گھر میں آئسولیشن میں رکھا ہے۔دوسری جانب کراچی میں بھی مختلف ہسپتالوں کے 4 ڈاکٹرز میں کورونا وائرس کی تصدیق کی گئی ہے ، واضح رہے کہ اب تک ملک میں کئی ڈاکٹرز کورونا وائرس میں مبتلا ہوچکے ہیں جب کہ گلگت بلتستان اور کراچی میں ڈاکٹر کورونا سے جاں بحق بھی ہوئے ہیں۔