اسلام آباد: پاکستان اور عالمی مالیاتی فنڈ ( آئی ایم ایف) کے درمیان سٹاف لیول معاہدہ طے پاگیا۔آئی ایم ایف نے کہا ہے کہ پاکستان کے ساتھ قرض پروگرام پر سٹاف لیول معاہدہ طے پا گیا، ایگزیکٹو بورڈ کی منظوری کے بعد پاکستان کو 1.2 ارب ڈالر ملیں گے۔آئی ایم ایف کی جانب سے جاری اعلامیے میں کہا گیا ہے کہ آئی ایم ایف کی معاونت سے جاری توسیعی فنڈ سہولت کے تحت پاکستان کا اقتصادی پروگرام بتدریج استحکام اور مارکیٹ اعتماد کی بحالی کی جانب گامزن ہے۔آئی ایم ایف کے جاری کردہ بیان میں کہا گیا ہے کہ مالی سال 2025ء میں پاکستان کا کرنٹ اکاؤنٹ 14 سال بعد پہلی بار سرپلس میں رہا، مالی توازن پروگرام ہدف سے بہتر رہا، افراط زر قابو میں ہے، زرمبادلہ کے ذخائر میں بہتری آئی ہے۔بیان میں مزید کہا گیا ہے کہ حالیہ سیلابوں نے لاکھوں افراد کو متاثر کیا، ایک ہزار سے زائد اموات ہوئیں، فصلوں اور مکانات کو شدید نقصان پہنچا، آئی ایم ایف کا کہنا تھا کہ ماحولیاتی خطرات سے نمٹنے کے لئے جامع اصلاحات اور پالیسیوں پر تسلسل کے ساتھ عمل درآمد ضروری ہے۔آئی ایم ایف نے اعتراف کیاکہ حکومت توانائی کے شعبے کی پائیداری، مالی نظم و ضبط اور ساختی اصلاحات کے ایجنڈے کو آگے بڑھانے کے لئے پرعزم ہے۔
تبصرے بند ہیں.