شوکت ترین کی جو کال لیک ہوئی وہ ہماری پبلک پوزیشن ہے

اسلام آباد – پی ٹی آئی رہنما فواد چوہدری کا کہنا ہے کہ شوکت ترین کی جو کال لیک ہوئی وہ ہماری پبلک پوزیشن ہے۔ایک بیان میں انہوں نے کہا کہ جب تک یہ نہیں بتائیں گے کہ گیس اور بجلی سے متعلق کیا ڈیل ہوئی ہے، ہم اس حکومت کی مدد نہیں کریں گے۔انہوں نے کورونا کے دنوں میں عمران خان نے بھی آئی ایم ایف سے بات کی تھی۔
بات کرنے سے ڈیل ختم نہیں ہوتی، اگر اس پروگرام سے متوسط طبقے کی کمر ہی توڑ دینی ہے تو ایسی شرائط ہم کیسے مان لیں۔فواد چوہدری نے شوکت ترین کی لیک کال سے متعلق کہا کہ جو کال لیک ہوئی وہ ہماری پبلک پوزیشن ہے، جب پیسے نہیں ہیں تو سرپلس کہاں سے دیں گے؟۔گذشتہ روز شوکت ترین اور پنجاب کے وزیر خزانہ محسن لغاری کے درمیان کی گئی ٹیلیفونک گفتگو لیک ہو گئی۔

شوکت ترین نے محسن لغاری کو کہا کہ یہ جو آئی ایم ایف کو 750 ارب کی کمٹمنٹ دی ہے آپ سب نے سائن کیا ہے،آپ نے اب کہنا ہے کہ ہم نے جو کمٹمنٹ دی تھی وہ سیلاب سے پہلے تھی ، آپ نے اب لکھنا ہے کہ سیلاب کی وجہ سے ہمیں بہت پیسہ خرچ کرنا پڑے گا ، آپ نے اب یہ لکھنا ہے کہ ہم یہ کمٹمنٹ پوری نہیں کر پائیں گے، یہی لکھنا ہے کہ آپ نے اور کچھ نہیں کرنا۔شوکت ترین نے مزید کہا کہ ہم سب چاہتے ہیں ان پر دباؤ بڑھے۔
یہ ہمیں اندر کرا رہے ہیں اور ہم پر دہشتگردی کے الزامات لگا رہے ہیں ، یہ بالکل اسپاٹ فری جا رہے ہیں یہ نہیں ہونے دینا۔شوکت ترین نے کہا کہ تیمور بھی ایک گھنٹے میں کرکے بھیج رہا ہے اور آپ بھی ذرا کہیں، مجھے بھیج دیں۔پھر ہم یہ کرکے وفاقی حکومت کو بھیج دیں گے، پھر ہم اس کو آئی ایم ایف کے نمائندوں کو ریلیز کر دیں گے۔شوکت ترین کی بات پر محسن لغاری نے سوال کیا کہ کیا اس ریاست کو نقصان نہیں ہوگا؟ جس کا جواب دیتے ہوئے شوکت ترین نے کہا یہ جس طرح چئیرمین اور دیگر کو ٹریٹ کر رہے ہیں اس سے ریاست کو نقصان نہیں ہو رہا؟۔
دیکھو یہ تو ضرور ہو گا کہ آئی ایم ایف کہے گا پیسے کہاں سے پورے کریں گے، یہ منی بجٹ لے کر آ جائیںگے۔یہ ہمیں مس ٹریٹ کر رہے ہیں اور ریاست کے نام پر بلیک میل کر رہے ہیں۔ہم ان کی مدد کرتے جائیں تو یہ تو نہیں ہو سکتا اور یہ ہم نے کل طے کیا ہے۔شوکت ترین نے کہا یہ آئی ایم ایف کو ریلیز کرنا ہے یا نہیں یہ ہم چئیرمین سے پوچھ لیں گے۔محسن لغاری نے کہا کہ سوشل میڈیا سے پاور فل ٹول ہی کوئی نہیں۔
شوکت ترین نے جوابا کہا کہ ہاں تو ہمیں ریلیز کرنے کی ضرورت ہی نہیں۔وہ سوشل میڈیا خود ہی کر دے گا۔شوکت ترین نے کہا کہ تیمور کہہ رہا تھا میں اس کے نمبر ٹو کو بہتر جانتا ہوں وہ ویسے ہی لیک کردے گا، ہم ایسا سین کریں گے کہ یہ نظر نہ آئے کہ ریاست کو نقصان پہنچا رہے ہیں۔

شوکت ترین اور وزیر خزانہ پنجاب کی ٹیلیفونک گفتگو سامنے آگئی#GeoNews pic.twitter.com/aq07VMhe6e

— Geo News Urdu (@geonews_urdu) August 29, 2022

۔پاکستان تحریک انصاف کی جانب سے تاحال اس آڈیو پر کوئی موقف یا وضاحت پیش نہیں کی گئی۔