روسی سٹار کو ڈنمارک کی کیرولین ووزنائیکی نے چھ چار ،دو چھ اور چھ دو سے شکست دی
نیویارک ( ) سابق ورلڈ چیمپئن ماریہ شیرا پووا یو ایس اوپن ٹینس ٹورنامنٹ میں اپ سیٹ شکست کے بعد ایونٹ سے باہر ہو گئی ۔ روجر فیڈرر اور ڈیوڈ فیریر اگلے راؤنڈ میں پہنچ گئے ۔ نیویارک سٹی میں جاری سیزن کے آخری گرینڈ سلیم میں مینز سنگلز مقابلے ہوئے ۔ ویمنز سنگلز کے چوتھے راؤنڈ میں روس کی سٹار کھلاڑی ماریہ شیراپووا کو ڈنمارک کی کیرولین ووزنائیکی سے اپ سیٹ شکست کا سامنا کرنا پڑا ۔ ووزنائیکی کو شیرا پووا کے خلاف چھ چار ، دو چھ اور چھ دو سے فتح حاصل ہوئی ۔ مینز سنگلز کے تیسرے راؤنڈ میں سوئس سٹار روجر فیڈرر نے سپینش حریف مارسل گرانولرز کو کانٹے کے مقابلے میں شکست دی ۔ سترہ بار کے گرینڈ سلیم چیمپئن روجر فیڈرر کو چار چھ ، چھ ایک ، چھ ایک اور چھ ایک سے کامیابی حاصل ہوئی ۔ سپین کے ڈیوڈ فیرر بھی فرانس کے جائیلز سائمن کو زیر کر کے اگلے راؤنڈ میں پہنچے ۔ آسٹریا کے ڈومینیک تھیم نے سپین کے فیلیسیانو لوپیز کو آؤٹ کلاس کر کے پری کوارٹر فائنل مرحلے میں جگہ بنائی ۔ جبکہ بلغاریہ کے گریگر دمیتروو بھی بیلجئیم کے ڈیوڈ گوفن کو مات دیکر اگلے راؤنڈ میں پہنچے ۔
تبصرے بند ہیں.