اسلام آباد: نیکٹا کے کوآرڈینیٹر کا کہنا ہے کہ اسٹیٹ بینک نے دہشت گردوں کی مالی معاونت پر 126 اکاؤنٹس منجمد کردیئے جب کہ ایف آئی اے نے دہشت گردوں کی مدد کے لیے آنے والے ایک ارب روپے ضبط کیے ہیں۔
نیشنل کاؤنٹر ٹیررازم اٹھارٹی (نیکٹا) کے نینشل کوآرڈینیٹر احسان غنی نے بتایا کہ دہشت گردوں کی مالی معاونت پر اسٹیٹ بنک نے 126 اکاونٹس منجمد کیے جب کہ ایف آئی اے نے دہشت گردوں کی مدد کے لیے آنے والے ایک ارب روپے ضبط کیے ہیں۔ انہوں نے کہا کہ سوشل میڈیا کے ذریعے دہشت گردی اور انتہا پسندی کو فروغ دینے والی 10 ویب سائٹس بند کردی گئیں جب کہ مزید 35 کو بند کرانے کی سفارش کی گئی ہے۔
احسان غنی نے کہا کہ گزشتہ ڈیڑھ سال کے دوران نیشنل ایکشن پلان کے تمام نکات پرعمل درآمد اورملک بھرمیں آپریشنزجاری ہیں، 12 لاکھ کومبنگ اور 20 لاکھ سٹاپ اینڈ سرچ آپریشن کیے گئے جب کہ انتہا پسندوں اور دہشت گردوں کے خلاف سب سے زیادہ کارروائیاں پنجاب میں ہوئیں جن میں ایک ہزار 808 دہشت گردوں کو ہلاک اور 411 دہشت گردوں کوپھانسیاں دی جاچکی ہیں۔ انہوں نے کہا کہ کراچی آپریشن کے دوران 70 ہزارجرائم پیشہ افراد کو گرفتار کیا گیا، کالعدم تنظیموں کی تعداد 61 ہوگئی جب کہ 2 تنظیموں کو واچ لسٹ میں شامل کررکھا ہے۔
تبصرے بند ہیں.