نیو یارک (نیٹ نیوز)کورونا وائرس کی وجہ سے دوران علاج کوما میں جانے والی امریکی خاتون کے ہاں بچے کی پیدائش ہوگئی جس کے بعد وہ ہوش میں بھی آگئیں۔اگرچہ ماضی میں بھی کوما میں جانے والی خواتین کے ہاں بچوں کی پیدائش ہوچکی ہے اور دماغی طور پر بھی مردہ پائی جانے والی خواتین نے بھی بچوں کو جنم دیا ہے، مگر کورونا سے متاثر ہوکر کوما میں جانے والی خاتون کے ہاں بچے کی پیدائش کا یہ اپنی نوعیت کا منفرد واقعہ ہے۔دلچسپ بات یہ ہےکہ کورونا وائرس کی وجہ سے کوما میں جانے والی خاتون اپنے ہاں بچے کی پیدائش کے بعد ہوش میں آگئیں اور اب وہ مکمل صحت مند ہیں۔برطانوی اخبار دی انڈیپینڈنٹ نے اپنی رپورٹ میں امریکی نشریاتی ادارے کی خبر کا حوالہ دیتے ہوئے بتایا کہ امریکی ریاست واشنگٹن کے شہر وینکوور کی خاتون کے ہاں کوما کے دوران بچے کی پیدائش ہوئی۔رپورٹ میں بتایا گیا کہ کوما میں جانے والی خاتون بچے کو جنم دینے کے کچھ دن بعد ہوش میں آگئیں اور انہوں نے ایک ٹی وی پروگرام میں آن لائن شرکت کی، جہاں انہوں نے پنے منفرد تجربے سے متعلق جذبات کا اظہار کیا۔
تبصرے بند ہیں.