اسلام آباد: نومنتخب وزیراعظم نواز شریف نے وزارت عظمیٰ کے عہدے کا حلف اٹھا لیا، صدر آصف علی زرداری نے ان سے حلف لیا۔ ایوان صدر میں نومنتخب وزیراعظم نواز شریف کی حلف برداری کی تقریب ایوان صدر میں منعقد کی گئی جس کا باقاعدہ آغاز تلاوت قرآن پاک سے کیا گیا۔ نومنتخب وزیراعظم نواز شریف کے پہنچنے پر صدر آصف علی زرداری نے ان کا استقبال کیا، اس موقع پر نواز شریف کالے رنگ کی شیروانی پہنے ہوئے تھے۔ تلاوت قرآن پاک کے بعد صدر آصف علی زرداری نے نواز شریف سے حلف لیا۔ حلف برداری کی تقریب میں مسلح افواج کے سربراہان اور مختلف ممالک کے سفیر بھی ایوان صدر میں موجود تھے۔ نگران کابینہ کے اراکین، یوسف رضا گیلانی، راجہ پرویز اشرف، فہمیدہ مرزا، فاروق ایچ نائیک، مولانا فضل الرحمان، چیف الیکشن کمشنر اور سیکریٹری الیکشن کمیشن نے بھی حلف برداری کی تقریب میں شرکت کی۔
تبصرے بند ہیں.